Quenindiole interpreta “Vinde bailare” no teatro Colón da Coruña
Como sabedes, o desenlace de cada edición do Quero Cantar desenvólvese nunha gala en directo no teatro Colón da Coruña. Na pasada edición participaron a banda xuvenil Máis boas cás patacas e as infantís As estrela dos rock, Os nenos da vella e Quenindiole, acompañados dunha banda emblemática como é Mamá Cabra.
Imos ir deixando por aquí fragmentos desa gala e empezamos hoxe coa actuación dos Quenindiole, a banda de música tradicional formada por rapazas e rapaces de Ferrolterra acumula xa unha ampla experiencia a pesar da súa reducida media de idade, e esta experiencia quedou ben patente na súa interpretación de Vinde bailare, o primeiro tema que compuxeron eles mesmos e co que se presentaron ao Quero Cantar 17.
Non vos prestaría a vós estar no seu lugar? Pois xa sabedes, a preparar un tema e presentarse ao Quero Cantar 18.
Máis boas cás patacas anímanvos a participar no Quero Cantar
A banda de Teo Máis boas cás patacas, gañadora da pasada edición na categoría xuvenil, expón brevemente neste pequeno vídeo os motivos polos que participar neste certame. Botádelle un ollo.
Convocada a 3ª edición do Quero Cantar
O BOP do 24 de abril publicaba as bases para a terceira edición do Certame de música infantil e xuvenil Quero Cantar, que xa podes consultar tamén no apartado correspondente desta páxina. Canda elas, publicábanse ademais as bases doutras nove convocatorias coas que a Deputación da Coruña busca fomentar a creación artística en eidos como a fotografía, as artes gráficas ou a literatura.
O disco Quero Cantar 17 está dispoñible no apartado Descargas
As 1000 unidades do CD que editamos coas seis cancións seleccionadas este ano xa están nas mans dos seus autores e tamén dos centros de educación primaria de toda Galicia. Todas as demais persoas que o desexen poden conseguilo no apartado Descargas desta páxina.
Os nenos da vella xa teñen videoclip!
Queremos cantar e queremos xogar!
Estamos de estrea e queremos celebralo con todo o mundo! O venres 2 de febreiro presentamos o videoclip da canción “Quero xogar” do grupo Os nenos da vella, gañadores do certame na categoría infantil. Animádevos a vir cantar… e xogar!
“Son muller”, de Máis boas cás patacas
Presentación de “Son muller” en Compostela
Parabéns, e grazas polas vosas cancións
As formacións musicais “Os nenos da vella” da Coruña e “Máis boas cás patacas” de Teo veñen de gañar a segunda edición do Concurso musical infantil e xuvenil “Quero Cantar”, co que a área de Cultura da Deputación Provincial da Coruña busca promocionar e difundir o uso da lingua galega, así como potenciar a creatividade poética e musical dos mozos e mozas da provincia.
Deste xeito, o grupo coruñés “Os nenos da vella”, alzouse co galardón na categoría infantil, na que participaron grupos de nenos e nenas de ata doce anos, coa interpretación do tema “Quero xogar”, unha peza orixinal composta por Noa, Mikel e Yune, coa axuda do seu mestre, Javi, que ergueu unha grande ovación por parte do público presente no Teatro Colón da Coruña.
Así mesmo, na categoría xuvenil, á que concorrían formacións musicais integradas por rapaces e rapazas de entre 13 e 16 anos, o primeiro premio foi para o grupo “Máis boas cás patacas” de Teo, unha banda musical composta por oito rapazas que interpretaron o tema “Son muller”, unha canción na que reivindican os dereitos e a igualdade para as mulleres.
En ambos os dous casos, as bandas acadaron un premio de 1.500 euros para mercar material musical e outros produtos culturais en galego, ademais de poder realizar a gravación dos videoclips das cancións gañadoras.
Pola súa parte, as restantes formacións que conseguron chegar á final do concurso, como é o caso de “Quenindiole” de Ferrolterra e “As estrelas do rock” de Bertamiráns-Ames, acadaron cadanseu premio de 1.000 e 500 euros, cos temas orixinais “Vinde bailare” e “Tolemia animal”.
Na súa intervención, a vicepresidenta e responsábel da área de Cultura da Deputación da Coruña, Goretti Sanmartín Rei, parabenizou a todos os grupos participantes e agradeceu a todas as persoas, maiores e pequenas, que se implicaron neste concurso que, segundo dixo, “quere animar a cantar á xente nova e considera ademais que a canción é unha ferramenta acaída para a transmisión da nosa lingua”. Anunciou que haberá unha terceira edición do Quero Cantar e convidou, desde xa, a participar diante dun auditorio composto en boa medida de nenos e nenas.
A gala, conducida pola contadora, fotógrafa e actriz, Sole Felloza, contou coa participación da emblemática banda infantil “Mamá Cabra”, que se encargou de abrir a cerimonia e amenizar a velada coa interpretación dalgúns dos seus temas máis coñecidos, mentres o xurado deliberaba sobre que grupos serían os galardoados nesta segunda edición do certame.
Xa que logo, “Os nenos da vella” e “Máis boas cás patacas” suceden á banda “Colaxe” de Laxe, gañadora da primeira edición do certame, no ano 2016.
As bandas gañadoras
“Os nenos da vella” é una formación coruñesa formada Noa (voz e percusión), Mikel (caixón e coros) e Yune (baixo e coros), e cuxo nome provén do lugar onde xogan e cantan a diario, pois a totalidade dos integrantes proceden do casco vello da cidade herculina.
Así, a formación complétase co mestre de música, Javi, co que se reúnen dende hai dous anos no local da Asociación Cidade Vella, para ensaiar as súas cancións e practicar con diferentes instrumentos musicais.
No caso de “Máis boas cás patacas”, trátase dunha banda teense integrada por oito rapazas do IES de Cacheiras, no que o talento das voces de Lua, Valeria e Ruth, a guitarra de Ana, o baixo de Sara, o uquelele de Carme, o piano de Cristina e a batería de Candela, seguen as indicacións da súa mestra de música, Matilde, para compor pezas tan fermosas como a que presentaron ao certame “Quero Cantar”.
E o venres 20, no Teatro Colón…
Xa coñecemos as bandas seleccionadas para esta nova edición do Quero cantar!
Volve o Quero cantar!
Colaxe, de Laxe, gaña a primeira edición do certame
Colaxe, de Laxe, é a banda gañadora da primeira edición do concurso de música infantil Quero Cantar, organizado pola área de Cultura da Deputación da Coruña. “A iniciativa naceu para que nenas e nenos se botaran a cantar en galego e acompañar o extraordinario momento da música infantil na nosa lingua”, dixo a vicepresidenta e responsábel da área de Cultura, Goretti Sanmartín na gala final que se desenvolveu este martes no Teatro Colón da Coruña.
Leila Santos, Colaxe, Xente Miúda de San Orente, o Colexio Manuela Rial Mouzo e a Banda Batuke, do colexio das xesuitinas da Coruña, foron as cinco bandas protagonistas este martes día 28 da final da primeira edición de Quero Cantar, o concurso de música infantil que convoca a área de Cultura da Deputación da Coruña. Os grupos chegaron a esta cita logo de superaren dúas fases onde deberon someterse ás valoracións dun xurado de artistas profesionais e tamén ao gusto do gran público a través dunha votación nas redes sociais.
“O máis relevante é que o “Quero Cantar” fixo que nenos e nenas cantaran na nosa lingua. Vivimos un momento excepcional para a música infantil en galego mais é preciso aínda animar ás crianzas a que se boten a cantar e ese era un dos obxectivos do concurso”, sinalou Goretti Sanmartín que defendeu na súa intervención o poder da canción como “unha maneira de transmitir a nosa lingua, de usala e de contaxiala”.
Para todas elas era unha cita moi especial, desbordante de emoción, alegría e tamén algúns nervios. Unha circunstancia que non obstante salvaron todas con notable bo facer e, deste xeito, a final converteuse nunha verdadeira festa que fixo as delicias dun Teatro Colón ateigado de grandes e crianzas. Conducida pola actriz Isabel Risco, a gala contou tamén coa participación dun dos estandartes da música infantil en Galiza, Pablo Díaz e a súa banda Tic-tac-toc, que se encargaron de abrir e pechar a tarde e de arroupar a rapazada no emotivo momento da lectura do veredicto.
A oportunidade de actuar nun escenario como o do Teatro Colón, a carón de artistas consagrados e cun amplo público, foi para os grupos participantes, unha recompensa para o traballo realizado na participación no concurso que comezou no momento en que decidiron compoñer unha canción para presentarse ao Quero Cantar.
“Durme Elsiña”, de Colaxe
Finalmente, o xurado formado por cinco nenas e nenos de diferentes etapas de educación primaria decidiu que a vencedora sexa a banda Colaxe, de Laxe. Para el vai o primeiro premio, que consiste na gravación dun videoclip e en 300 € para a compra de material musical. Colaxe é un grupo formado na vila de Laxe por catro compoñentes e que ten unha salientable vocación didáctica xa que adoitan facer actuacións para público familiar nos que a interactuación cos asistentes cobra sempre un papel especial. O guitarrista, Fernando, compuxo o arrolo Durme, Elsiña para lle cantar á súa filla Elsa cando esta era pequena. Agora Elsa ten sete anos e é ela mesma quen o interpreta para presentarse ao Quero Cantar.
Os restantes catro finalistas tamén reciben cadansúa cantidade para a compra de material. Ademais, estas cinco cancións finalistas, xunto con outras cinco cancións que as acompañaban na fase previa, pasan a formar parte do disco Quero Cantar 2016, que a Deputación da Coruña vai editar e distribuír entre colexios públicos de toda Galicia e que tamén se poderá descargar de balde desde a páxina web www.querocantar.gal.
O nome do concurso, Quero Cantar, está tirado dunha coñecida copla popular que recolle ben o espírito do que pretende ser esta iniciativa, na que prima a creatividade e onde se reivindica o gusto pola música e o canto. Ese espírito foi o que se viu reflectido sobre o palco do Colón cando, no remate da gala, tras a lectura do veredicto, todas as bandas interpretaron xuntas o retrouso dese Quero cantar que xa se converteu en sintonía oficial do certame.
Achégase a gala final!
Resultado da segunda fase do concurso Quero cantar
O domingo ás oito da tarde remataba o prazo para votar a través da rede social Facebook e o resultado da consulta popular deu xa as cancións e as bandas que participarán na gala final do certame Quero Cantar, que ha ter lugar no Teatro Colón da Coruña o vindeiro mes de xuño. O público puido escoitar e escoller entre os dez temas que superaron a primeira fase e cos seus Gústame decidiu que as bandas finalistas fosen:
-Colaxe, de Laxe, coa canción Durme, Elsiña
-Grupo do Colexio Manuela Rial Mouzo, de Cee, coa canción Soños
-Xente miúda de San Orente, da Serra de Outes, coa canción Escola
-Banda batuke do Colexio das Xesuitinas, da Coruña, coa canción Samaín
-Leila Santos, do Porto do Son, coa canción A árbore tropical
Serán as cinco bandas finalistas da primeira edición do certame, convocado pola área de Cultura da Deputación da Coruña co obxectivo de impulsar a creación poética e musical en galego entre a rapazada. Ao certame presentáronse 18 propostas, enviadas todas desde diferentes puntos da Coruña, coa excepción dun tema composto por un grupo de Chantada.
“Trátase dunha primeira experiencia que tiña como obxectivo poñer a cantar a nenos e nenas na nosa lingua nun momento de especial relevancia para a música en galego para o público infantil. Quixemos que as crianzas fosen cómplices e protagonistas no certame ao que lle queda aínda unha terceira fase que será a gala que se está a preparar con moito entusiasmo”, explicou a vicepresidenta e responsábel da área de Cultura, Goretti Sanmartín Rei.
De entre todas as cancións recibidas, un xurado formado por músicas e cantantes con experiencia no ámbito da música infantil encargouse de seleccionar estas dez que agora se sometían á votación pública na páxina Facebook do concurso.
As dez cancións que superaron a selección do xurado profesional conseguiron xa o primeiro dos premios, que é a súa gravación profesional e a inclusión nun CD que ha ser distribuído por colexios públicos de toda Galiza, ao tempo que ha poder ser descargado de balde desde a páxina www.querocantar.gal , onde agora mesmo se poden escoitar tamén todas as maquetas e vídeos recibidos inicialmente.
AQUÍ pode descargarse o comunicado da Deputación.
Comeza a votación popular!
Dez cancións pasan á segunda fase do concurso Quero Cantar
16 de Maio de 2016 – Uxía, Ugia Pedreira, Lydia Botana, Alba María e Tomi López –do grupo Mamá Cabra- foron as artistas encargadas de seleccionar as cancións que continúan na segunda fase do Quero Cantar, o concurso musical infantil convocado pola área de Cultura da Deputación da Coruña.
Nunha reunión que tivo lugar o pasado venres e que contou coa presenza da responsábel da área de Cultura, Goretti Sanmartín –sen voto- as creadoras valoraron as 17 cancións admitidas na primeira fase e seleccionaron 10 delas, atendendo a criterios como a calidade musical e literaria dos temas ou a súa adecuación ao público infantil. As cancións que continúan andaina nesta primeira convocatoria do certame son:
-Escola, de Xente Miúda de San Orente (Serra de Outes)
-Eu vivo, dos bananas (A Coruña)
-A árbore tropical, de Leila Santos (Porto do Son)
-Soños, do grupo da Escola Manuela Rial Mouzo (Cee)
-Antón, de Proxecto Nordés (Cee)
-Durme, Elsiña, de Colaxe (Laxe)
-Queremos cantar, do grupo Cantadeiras, do Ceip Camiño Inglés (Oroso)
-Imos ver, do grupo Canta con nós (Ferrol)
-Samaín, da Banda batuke do Colexio fillas de Xesús (A Coruña)
-Miña terra galega, de Aarón e Miriam (Culleredo)
“Poñer a nenas e nenos a cantar na nosa lingua foi xa un dos obxectivos desta primeira fase que procura animar a crear en galego a través da música”, explicou a vicepresidenta e responsábel da área da Deputación da Coruña, Goretti Sanmartín para quen a iniciativa, “acompaña un momento especialmente vizoso na música en galego destinada a infancia, do que son proba as participantes neste xurado de excepción”.
Votación na rede para a nova fase a partir do 23
Estas dez agrupacións acceden xa ao primeiro dos premios que concede o concurso, a gravación en estudio e a posterior edición conxunta nun disco que se ha distribuír entre centros educativos públicos de toda Galicia. Mais o concurso continúa e o vindeiro luns, día 23, dá comezo a segunda fase, unha votación aberta ao público na páxina en Facebook de Quero Cantar, cuxo propósito é escoller as cinco cancións que no vindeiro mes de xuño han participar na gala final do Teatro Colón da cidade da Coruña. Alí, ante o público e ante un xurado formado por cinco nenas e nenos de diversas etapas de educación primaria, os cinco finalistas deberán interpretar en directo as súas cancións, para que se decida así a proposta gañadora absoluta do Quero Cantar 2016. O premio para esta proposta gañadora consiste na gravación dun videoclip e en 300 euros para a compra de material musical.
Tanto as cancións seleccionadas como o resto das presentadas continúan dispoñibles ao público na páxina www.querocantar.gal
